Norske reisemål inn i verdas største KI-fellesskap for destinasjonar

Norwegian Travel Cluster er i 2026 ein del av AI Opener for Destinations – og alle som deltek i programmet «KI-klare destinasjonar» får tilgang til verktøykasse, seminar og eit internasjonalt nettverk av over 120 destinasjonar frå Europa, USA og Canada.

AI Opener for Destinations er eit lærings- og utviklingsprogram driven av Group NAO, der destinasjonsorganisasjonar saman utforskar korleis kunstig intelligens påverkar reiselivet – strategisk, etisk og i praksis. Programmet er skreddarsydd for destinasjonsselskap og gir tilgang til månadelege samlingar, praktiske verktøy, ekspertinnlegg og erfaringsdeling på tvers av landegrenser.

Gjennom samarbeidet får deltakarane i NTCs program «KI-klare destinasjonar» tilgang til dette nettverket og ressursane som følgjer med. Det inkluderer ein verktøykasse med konkrete KI-verktøy for destinasjonsarbeid, fagleg påfyll og ein fellesarena der over 300 fagfolk frå heile verda deler erfaringar og løysingar.

Behovet er godt dokumentert: ei fersk undersøking frå AI Opener viser at nesten alle (99 prosent) destinasjonsprofesjonelle har prøvd KI-verktøy, men berre 16 prosent av organisasjonane har ein KI-strategi på plass. Norske reisemål er ikkje åleine om å stå i denne situasjonen – og det er nettopp difor det er verdifullt å stå saman med kollegaer frå heile verda som jobbar med dei same spørsmåla.

‍