AccessNorway: Visit Voss med ny tilgjengelegheitsside

Besøket var ein del av AccessNorway, eit samarbeid mellom Norwegian Travel Cluster, Inklu-Beitostølen og Sunnaasstiftelsen, der alle reisemåla i Norwegian Travel Cluster deltek. Med støtte frå BUFDIR utvikla partnarane i 2025 ei verktøykasse som hjelper bedrifter og reisemål til å jobbe trinn for trinn mot eit meir tilgjengeleg tilbod. Fysiske besøk som dette er ein sentral del av metoden.

Mange gode løysingar – lite synleggjort

Voss har eit sterkt utgangspunkt. Aktørar som Vossabadet, Elva Hotel og Voss Vind har allereie gode fysiske løysingar på plass: trinnfri tilkomst, heis, HC-garderober og tilrettelagde aktivitetar. Voss sentrum er oversiktleg, med brei fortauskant og god framkomst frå Vossavangen til stasjonen.

Utfordringa er den same som går att på reisemål etter reisemål: informasjonen når ikkje ut til gjestane. Ord som «rullestolvennleg» og «tilpassa» seier lite i seg sjølv. Det gjestane treng er konkret informasjon om dørbreidder, heis, HC-toalett og romutforming – gjerne med bilete som viser dei faktiske forholda.

Enkle grep med stor effekt

Kartlegginga peika på fleire tiltak som kostar lite, men betyr mykje i praksis: knaggar bør plasserast i sittehøgde, dører bør ha handtak på innsida slik at dei kan lukkast frå rullestol, og dusjkrakk og hånddusj i sittehøgde i vanlege garderober kan redusere ventetid på HC-garderobe. Vossabadet sitt terapibasseng med integrert heis er eit godt døme på ei løysing som er verdt å løfte fram – men som i dag er lite kjend fordi det ikkje er omtala på nettsida.

Tilgjengelegheitsguide – eit grep alle kan starte med

Det viktigaste tiltaket etter besøket er at Visit Voss har utvikla ei eiga tilgjengelegheitsside etter mal frå verktøykassen til Inklu: voss-bygd-alle. Her samlar dei informasjon om kva som finst på destinasjonen, skildrar reisekjeda og løftar fram aktørar som har gode løysingar.

Dette er eit grep alle destinasjonar kan starte med – og det treng ikkje vere ferdig for å publiserast. Poenget er å kome i gang, vise kva ein faktisk tilbyr, og byggje ut sida i takt med at arbeidet skrir fram. Ei slik side gjer planlegging enklare, skapar realistiske forventningar og aukar tilliten til destinasjonen.

– Å utvikle ein tilgjengelegheitsguide handlar ikkje om å vere tilpassa på alle moglege måtar. Det viktigaste er å kome i gang og vise kva ein kan tilby og ikkje, heiter det i verktøykassen frå AccessNorway.

‍